გუშინ, 24 დეკემბერს, ზუგდიდი განსაკუთრებული კულტურული მოვლენის ეპიცენტრი გახდა. ლიტერატურული ფესტივალი "კოლხური დიადემა" და საქართველოს მწერალთა და შემოქმედთა კავშირის რეგიონალური ორგანიზაცია მასპინძლობდა გამორჩეულ ქართველს, ექიმსა და საზოგადო მოღვაწეს, ბატონ მერაბ კვიცარიძეს.

"ცისფერყანწელები" და დიდი ქართველობის გაკვეთილი შეხვედრა, რომელიც ზუგდიდის საზოგადოებისთვის ნამდვილ ზეიმად იქცა, საქართველოს მწერალთა და შემოქმედთა კავშირის რეგიონალურმა ხელმძღვანელმა, ლაშა გვასალიამ გახსნა. მან აუდიტორიას წარუდგინა ბატონი მერაბ კვიცარიძე, როგორც ეროვნული ღირებულებების მატარებელი პიროვნება და სიტყვა გადასცა მას.

15:00 საათზე დაწყებული ლექცია არ ყოფილა მხოლოდ ისტორიული ექსკურსი. ბატონმა მერაბმა ზუგდიდელ მსმენელს "ცისფერყანწელების" ეპოქა გააცოცხლებინა. დარბაზში სრული სიჩუმე და განაბული მზერა სუფევდა. პედაგოგები და მოსწავლეები აღფრთოვანებას ვერ მალავდნენ იმ ემოციისა და სიღრმის გამო, რომლითაც სტუმარი საუბრობდა.

განსაკუთრებით აღსანიშნავია ბატონი მერაბის ფენომენალური ნიჭი და სიყვარული ქართული პოეზიისადმი. მისი საუბარი "ვეფხისტყაოსანზე" მსმენელში გაოცებას იწვევს. მისთვის რუსთაველი არ არის მხოლოდ ავტორი, ეს არის ქართველობის კოდექსი. მან ზეპირად იცის პოემის უმნიშვნელოვანესი პასაჟები და თითოეულ სტროფს ისეთი ანალიზით გადმოსცემს, რაც მხოლოდ ჭეშმარიტ მამულიშვილს ძალუძს. შეხვედრის დასრულების შემდეგაც არ წყდება ზარები და მადლიერების შეტყობინებები — საზოგადოება კვლავ ითხოვს ამ ბუმბერაზ ადამიანთან შეხვედრას.

მეგობრობის უკვდავყოფა — პატივისცემა ბონდო ჯიქიას ხსოვნისადმი ვიზიტს, კულტურულთან ერთად, უდიდესი მორალური და ადამიანური დატვირთვაც ჰქონდა. ეს იყო ბატონი მერაბ კვიცარიძის პირადი, გულითადი ჟესტი მისი მეგობრის, სამეგრელო-ზემო სვანეთის ყოფილი გუბერნატორის, ბატონი ბონდო ჯიქიას ხსოვნისადმი.

დღის განმავლობაში სტუმრებმა ბონდო ჯიქიას სახელობის სკოლას საჩუქრად გადასცეს ბანერი ზურაბ გორგილაძის იმ ლექსით, რომელიც პოეტმა თავის დროზე ბატონ ბონდოს მიუძღვნა. თუმცა, ყველაზე ემოციური მომენტი დღის ბოლოს, ოფიციალური ნაწილისა და ტრადიციული მეგრული მასპინძლობის შემდეგ შედგა: ბატონმა მერაბმა ბონდო ჯიქიას ოჯახს გადასცა იგივე ლექსი, ამჯერად მარმარილოზე ამოტვიფრული. ეს მემორიალური დაფა ბატონი ბონდოს საფლავზე დაიდგმება, როგორც სიმბოლო იმისა, რომ ღირსეული მამულიშვილებისა და ერთგული მეგობრების ხსოვნა არასდროს ქრება.

ეს დღე იყო დასტური იმისა, რომ ზუგდიდი აფასებს ნიჭს, პატრიოტიზმს და, რაც მთავარია, ადამიანურ ურთიერთობებს. უკვე დაგეგმილია სამომავლო პროექტებიც, რომელთა შესახებ "კოლხური დიადემა" საზოგადოებას მალე ამცნობს.